ANA FERREIRO nace en Ribadavia (Ourense), reside en Ourense desde 1994. Nesta mesma cidade, na Escola de Artes e Oficios, formouse en pintura ao óleo.

O estilo referido ao carácter persoal de Ana Ferreiro é o mesmo que dá á súa obra, na elección dos temas, tipo de composición, pigmentos, grafismos e texturas concretas que a diferencian dos demais. Coexisten numerosos estilos ou tendencias artísticas, que se poden englobar en grandes grupos estéticos con similares características plásticas. Paisaxes con historia ou simplemente reflexión, personaxes con experiencias cómodas ou tristemente difíciles, tenros ou salvaxes animais..., son algúns dos sentimentos que consegue arrancar de cada un de nós Ana Ferreiro.

A obra de Ana estuda as tendencias actuais e consegue mostrar á perfección nos seus elaborados lenzos, figuración realista e abstracción.

Ana Ferreiro significa fidelidade á representación e afán por reflectir as apariencias das cousas desde a súa máis respectuosa percepción artística.

A perfección das formas figurativas, o exacto emprego de pigmentos cromáticos que delimitan o artístico do conceptual converten as imaxes reais en obras de grande solidez imaxinativa, facendo da obra de Ana un proxecto serio de grande peso creativo e decididamente artístico.

Impregnada de sensibilidade, a súa coidada técnica pictórica plasma a materia seleccionada co pigmento oleoso adecuado, outorgándolle á obra, a luz e transparencia debida en cada caso.